Skólaráð

Uppfært föstudaginn 14. nóvember 2025

Um skólaráð

Skólaráð er lögbundinn samráðsvettvangur í öllum grunnskólum landsins og starfar samkvæmt 8. gr. laga um grunnskóla nr. 91/2008. Ráðið er skipað fulltrúum allra helstu hópa skólasamfélagsins – nemendum, foreldrum, kennurum, öðru starfsfólki og grenndarsamfélaginu – auk skólastjóra, sem ber ábyrgð á rekstri skólans og stýrir fundum ráðsins.

Hlutverk skólaráðs er að tryggja lýðræðislega umræðu um málefni sem varða skólann, mótun stefnu hans og sérkenna og þannig stuðla að farsælu skólastarfinu. Skólaráð fjallar meðal annars um skólanámskrá, starfsáætlanir, rekstraráætlanir, skólareglur og aðrar áætlanir sem snerta skólastarf, auk þess að veita umsögn um fyrirhugaðar meiriháttar breytingar á skólahaldi, sbr. reglugerð um skólaráð nr. 1157/2008.

Skólaráð fylgist jafnframt með öryggi, aðbúnaði og almennri velferð nemenda og tekur við ábendingum frá skólasamfélaginu. Markmiðið er að tryggja að raddir allra hópa skólans heyrist og að ákvörðunartaka byggist á samráði og sameiginlegri ábyrgð til heilla fyrir nemendur og skólastarf í heild.

Um sameiningu skólaráðs og gæðaráðs skólaveturinn 2025-2026

Vegna erfiðleika við að manna gæðaráð á fullnægjandi hátt hefur verið ákveðið að sameina gæðaráð og skólaráð á skólaárinu 2025–2026. Á fundi skólaráðs þann 14. nóvember 2025 samþykkti ráðið að taka tímabundið að sér þau verkefni sem gæðaráð sinnir samkvæmt verklagi skólans. Þetta var einnig borið undir fræðslunefnd á fundi þeirra þriðjudaginn 11. nóvember 2025.

Gæðaráð sinnir hefðbundnu hlutverki matsteymis í innra mati skólans. Samkvæmt 36. gr. laga um grunnskóla nr. 91/2008 skal hver grunnskóli framkvæma innra mat með kerfisbundnum hætti og með virkri þátttöku starfsmanna, nemenda og foreldra. Markmið innra mats, samkvæmt 35. gr. laganna, er að tryggja að skólastarf sé í samræmi við lög og aðalnámskrá, stuðla að umbótum og tryggja að réttindi nemenda séu virt.

Í leiðbeiningum um innra mat er lögð áhersla á að koma á fót matsteymi (þ.e. gæðaráði) með fulltrúum stjórnenda, kennara, annarra starfsmanna, nemenda og foreldra. Teymið sér um skipulagningu matsins, gagnasöfnun, greiningu og eftirfylgni umbóta og hefur þannig lykilhlutverk í gæða- og umbótastarfi skólans. Innra mat á að vera samofið daglegu skólastarfi og byggja á þátttöku allra hagsmunahópa.

Með því að fela skólaráði verkefni gæðaráðs er tryggt að lögbundin skylda skólans til að framkvæma innra mat haldist órofin og að áfram verði unnið markvisst að greiningu, umbótum og eftirfylgni í skólastarfi á árinu 2025–2026.

Fulltrúar í skólaráði Auðarskóla 2025-2026

Guðmundur Kári Þorgrímsson, starfandi skólastjóri

Aðalheiður Rós Unnsteinsdóttir, fulltrúi nemenda

Daldís Ronja Líndal Jensdóttir, fulltrúi nemenda

Ragnheiður Helga Bæringsdóttir fulltrúi kennara

Katrín Kristjánsdóttir, fulltrúi kennara

Jóhanna Lind Brynjólfsdóttir, fulltrúi starfsmanna KÍ

Íris Dröfn Brynjólfsdóttir, fulltrúi annars starfsfólks

Stefanía Anna Vilhjálmsdóttir, fulltrúi foreldra

Dagný Lára Mikaelsdóttir, fulltrúi foreldra

Guðrún Erna Magnúsdóttir, fulltrúi grenndarsamfélags

Fundargerðir skólaráðs

Smelltu hér til að nálgast fundargerðir skólaráðs.

Starfsáætlun skólaráðs 2025-2026