Stefna skólans í heimanámi er að heimanám hafi skýr markmið og skýran tilgang og sé ekki byrði á heimilum nemenda. Lögð er mikil áhersla á heimalestur og er hann rauði þráðurinn í heimanáminu alla skólagönguna.
Markmið með heimanámi
Í Auðarskóla er lögð áhersla á að heimanám sé hóflegt og þjóni fernum tilgangi:
- Að nemandinn fái verkefni sem ætlað er að festa námsatriði í minni (upprifjun).
- Að nemandinn fái verkefni sem undirbúa önnur sem lögð verða fyrir í kennslustund.
- Að nemandanum sé ætlað að ljúka verkefni sem honum tókst ekki í kennslustund.
- Að nemandinn fari með verkefni heim til sín til að sýna foreldrum og veita þeim þannig tækifæri til að taka þátt í námi barna sinna.
Eðlilegt er að skóli og heimili hafi jákvæð samskipti um heimanám og foreldrar ráðgist við kennara um umfangið – hvort heldur sem þeim finnst það of mikið eða lítið.
Í Aðalnámskrá grunnskóla kemur skýrt fram að foreldrar og forráðamenn beri frumábyrgð á uppeldi barna sinna en jafnframt stendur þar að þeir þrír hópar sem mynda skólasamfélagið (nemendur, starfsfólk skólans og foreldrar) vinni vel saman. Mikilvægt er að foreldrar styðji við nám og vinnu barna sinna og gert er ráð fyrir að lestrarfærni sé þjálfuð heima daglega eins lengi og þörf er á. Um annað heimanám gildir sú meginregla að þar sem nemendur eru ólíkir þá beri að koma til móts við námsþarfir þeirra á forsendum hvers og eins. Heimanám er hluti af námi nemandans og er í öllum tilfellum tekið inn í námsmat.
Námsáætlanir og heimalestur
Námsáætlanir eru sendar heim og/eða settar inn á Mentor og á ASKINN. Á vikuáætlunum kemur fram áætluð vinna nemenda, heimanám, ýmsar upplýsingar og tilkynningar. Foreldrar hafa aðgang að námsáætlunum á Mentor og á ASKINUM:
Til að byrjendur nái góðum árangri í lestri er mjög mikilvægt að lesa upphátt heima alla virka daga (raddlestur). Við upphaf lestrarnáms er góð regla að lesa hverja blaðsíðu að minnsta kosti tvisvar sinnum. Slík þjálfun gefur barninu aukna færni í lestri orðmynda, auk þess sem lesturinn verður oftast þjálli þegar sami texti er lesinn öðru sinni. Lesið er í áheyrn fullorðins og kvittað er fyrir áheyrn í þar til gerð kvittanahefti. Áhersla er lögð á að nemendur fái efni við hæfi svo að lesturinn verði sem ánægjulegastur. Að lesa fyrir börn er góður grunnur fyrir allt nám. Foreldrar eru hvattir til að lesa áfram upphátt fyrir börn sín, jafnvel þó þau séu sjálf farin að lesa. Flest börn ráða einungis við mjög léttan texta í byrjun, en hafa þörf fyrir að vinna með flóknari texta sem fellur betur að þroska þeirra og áhuga. Lestur foreldra og umfjöllun um textann, eykur orðaforða barnanna og bætir málþroska, en góður málþroski er einmitt einn af grunnþáttum alls náms líkt og lesa má um í læsisstefnu Auðarskóla. Læsisstefna Auðarskóla er að finna á heimasíðu Auðarskóla hér.