Elsku foreldrar og forráðamenn barna í Auðarskóla öllum,
Á skólaráðsfundi 14. nóvember síðastliðinn var rætt mikilvægi þess að efla samstarf skóla og heimilis þegar kemur að lestrarkennslu og tryggja að bæði starfsfólk og foreldrar hafi sameiginlega þekkingu á áhrifaríkum leiðum til að styðja við lestrarnám barna. Rannsóknir á heimalestri hafa sýnt að markviss inngrip sem fela í sér fræðslu og leiðsögn til foreldra hafa marktæk áhrif á framfarir barna í lestri samanborið við að engin slík íhlutun fari fram. Árangurinn er mestur þegar foreldrum/forráðamönnum er veitt hagnýt leiðsögn um hvernig þeir geti hlustað á barnið lesa, stutt það með uppbyggilegum hætti og unnið með einfaldar lestraræfingar í daglegu lífi.
Jafnframt er mikilvægt að viðurkenna að margir foreldrar/forráðamenn finna til óöryggis í tengslum við heimalestur. Það er algeng og fullkomlega skiljanleg upplifun í ljósi þess að foreldrar/forráðamenn fá takmarkaða kennslu í þeim þáttum sem liggja að baki lestrarfærni. Það er því fremur ósanngjörn krafa á foreldra/forráðamenn að sinna þessu hlutverki án þess að þeim standi til boða viðeigandi fræðsla og leiðsögn.
Til að mæta þessum vanda og styðja foreldra/forráðamenn í þessu mikilvæga hlutverki hefur Foreldrafélag Auðarskóla skipulagt lestrarkennslufræðslu sérstaklega miðaða að foreldrum/forráðamönnum:
Mánudaginn 26. janúar kl. 17:00-19:00 býður Foreldrafélag skólans foreldrum og forráðamönnum barna í leik- og grunnskóla velkomin á lestrarfræðslu. Hana veitir Sigurlaug Rún Brynleifsdóttir læsisfræðingur, atferlisfræðingur og kennari sem starfar sem kennsluráðgjafi hjá Kópavogsbæ.
Á fræðslunni verður fjallað um hvernig foreldrar/forráðamenn geta:
- stutt við lestur barna sinna heima,
- skipulagt heimalestrarþjálfun,
- aukið hvata barna til lesturs.
Fræðslan verður sniðin að foreldrum/forráðamönnum barna á öllum aldri með leiðbeiningum sem auðvelt er að nýta í daglegu lífi fjölskyldunnar.
Það er mín einlæga ósk að þið nýtið ykkur þessa heimsókn frá þessum fjölhæfa fagaðila. Skrifið þetta niður í dagatalið ykkar. Við hlökkum til að fá hana Sigurlaugu í heimsókn og ég hlakka til að taka á móti ykkur í skólanum okkar.
Guðmundur Kári Þorgrímsson
Starfandi skólastjóri Auðarskóla